Ebola

Ebolaviruset smittar gjennom blod og andre kroppsvæsker, og smittefaren er særleg stor når ein skal handtere personar som har døydd av sjukdommen. Førebyggjande arbeid er vanskeleg på grunn av den militære konflikten i Aust-Kongo.

Ebola er det franske namnet på ei sideelv av Kongoelva. På det lokale språket ngbandi heiter elva Legbala, og Ebola er visstnok ei forvrenging av Legbala, som tyder ‘kvitt vatn’. Elvenamnet Ebola skriv vi med stor forbokstav, men sjukdommen må skrivast ebola med liten forbokstav til liks med andre sjukdomsnemningar.

Samansetningar som ebolavirus, ebolautbrot og ebolasmitte skriv vi utan bindestrek, slik hovudregelen er for samansette ord i norsk.

Uttalen av ebola varierer noko, men trykket ligg oftast på første stavinga (ebola).

---