Unngå substantivtunge setningar.

Slike setningar inneheld gjerne eitt eller fleire substantiv på -ing og eitt eller fleire verb som ikkje har noko eige innhald. Slike setningar gjer teksten tung å lese. Det er betre å bruke konkrete verb.

«Å gjere potetene til gjenstand for langvarig koking» er ikkje noko anna enn å koke potetene lenge. Verbet («koke») gir mykje informasjon om kva setninga handlar om. Brukar du eit konkret verb tidleg i setninga, kjem lesaren lettare til poenget.

Døme
Saka vart gjord til gjenstand for drøfting.

Forslag til omformulering
Saka vart drøfta.

Døme
Det vart føreteke forkynning av tiltalen.

Kommentar til døme
Verbet føreta har ikkje noko sjølvstendig innhald og kan sløyfast.

Forslag til omformulering
Tiltalen vart forkynt.

Døme
Det er føreteke ei standardheving. Det er òg utført måling av innvendige overflater.

Kommentar til døme
Verbet føreta og utføre har ikkje noko sjølvstendig innhald og kan sløyfast.

Forslag til omformulering
Standarden er heva, og innvendige overflater er måla.

Døme
Det bør skje ei innskjerping av dagens dispensasjonspraksis.

Kommentar til døme
Verbet skje har ikkje noko sjølvstendig innhald og kan sløyfast.

Forslag til omformulering
Dagens dispensasjonspraksis bør skjerpast inn.

Skriv ut