Om omsetjaren
Omsetjaren er truleg Aasta Hansteen, jf. Elisabeth Aasen: «Aasta Hansteen som poet og målkvinne.» I: Lein m.fl. (red.): Furier er også kvinner. Aasta Hansteen 1824-1908. Oslo/Bergen/Stavanger/Tromsø 1984, s. 214. Der blir det opplyst at Paul Botten-Hansen i utgåva si av Skrift og Umskrift (Bergen offentlege bibliotek har boka no) har skrive: «Af Aasta Hansteen, Prof.'s Datter. Prøver har først staaet i Folkevennen.» Sjå òg Reidar Djupedal: Ivar Aasen. Brev og Dagbøker. Oslo: Det Norske Samlaget 1958. Band 2, s. 320.
Aasta Hansteen (1824–1908). Fødd i Christiania. Kvinnesakskvinne og målar. Dotter til geofysikaren og astronomen Chr. Hansteen. Studerte måling mellom anna i Düsseldorf, representert i Nasjonalgalleriet. Vart tidleg oppglødd for målsaka. Gav ut anonymt Skrift og Umskrift i Landsmaalet i 1862. Skreiv dikt på landsmål i Dølen og Ferdamannen. Var mellom dei første som tok i bruk det gamle hovudstadsnamnet Oslo. Frå 1870 ofra ho seg fullt og heilt for kvinnesaka og skreiv i den samanhengen ei mengd artiklar og brosjyrar.